«Алкоголизмге шалдыққан адамдарды оңалту» дегеніміз не
Алкоголизмге шалдыққан адамдарды оңалту — алкоголизмді емдеудің тиімділігі дәлелденген негізгі әдісі. Улануды жою және ішімдікті ұзақ ішуден шығару — тәуелділіктен арылудың алғашқы қадамы ғана. Алкоголизм, химиялық тәуелділіктің (нашақорлықтың) кез келген басқа түрі сияқты, алкоголь ішуге деген айқын құштарлық немесе әуестік кезеңдерімен қатар жүреді және сол уақытта оған қарсы тұру өте қиын. Оңалтуды психологтар мен психотерапевттер жеке және топтық психотерапия барысында жүргізеді.
Ішімдікті ұзақ ішуден шығару адамның енді мүлде ішпеуіне қол жеткізуден әлдеқайда оңай!
Алкогольге тәуелділікті емдеу алкогольдік улануды немесе алкогольден бас тарту синдромын жоюмен шектелмейді. Тәуелді адам тәуелділіктен арылу жолында ұзақ әрі күрделі жолдан өтуге тиіс.
Сауығу жолында көп нәрседен өтіп, жаңаны үйрену, өз бойынан алкоголь ішпей өмір сүру мүмкіндігін табу қажет екенін түсіну маңызды. Алкоголизмге шалдыққан адамдарды оңалту барысында дәл осы үдеріс жүреді.
Қазақстанда алкоголизмге шалдыққан адамдарды оңалту қалай өтеді
Батыс мамандарының бір бөлігі адамның ауруының қайталану немесе қайта ішіп кету қаупін барынша азайтуы үшін бірнеше айлық ұзақ оңалту қажет екенін ашық айтады. Ең қолайлы жағдайда алкоголь ішу мүмкіндігін жоққа шығаратын орындарда болу мерзімі 12 айға дейін созылады. Дәл осы кезеңде алкогольге патологиялық құштарлық деңгейі төмендеп, адамның қалыпты өмірге оралу мүмкіндігі бірнеше есе артады.
Қазақстанда «Республикалық психикалық денсаулық орталығы» ШЖҚ РМК жағдайында мемлекет есебінен тегін емделу мүмкіндігі бар. Онда негізгі емдеу әдісі — психологтар мен психотерапевттердің бірлескен жұмысы арқылы пациенттерді оңалту. Аталған медициналық-әлеуметтік оңалту бағдарламасының көптеген сөзсіз артықшылығы бар, оның үстіне қазір есепке қоймай ауруханаға жатқызу тәжірибесі қолданылады.
Астанада алкоголизмге шалдыққан адамдарды оңалту
Біздің клиникада қолданыстағы өзара іс-қимыл туралы меморандум аясында пациенттерді уытсыздандыру терапиясы курсынан кейін емін жалғастыру үшін басқа мекемеге бағыттау мүмкіндігі бар.
Сонымен қатар химиялық және химиялық емес тәуелділігі бар адамдарға осындай қызмет көрсететін бірқатар жеке оңалту орталығы жұмыс істейді. Олардың көпшілігі тәуелділіктен арылудың 12 қадамдық бағдарламасы қағидатымен жұмыс істейді, ал басқалары рухани бағыттағы әдістемелерге маманданған.
Менталдық денсаулық клиникасы Қазақстанның, Ресейдің және Өзбекстанның жетекші оңалту орталықтарымен ынтымақтасып, пациенттерді емдеуді үйлестіреді.
Оңалту бағдарламаларына бұған дейін бағдарламаны сәтті аяқтаған адамдар арасынан шыққан тәуелділік жөніндегі кеңесшілер белсенді қатысады. Сонымен бірге, біздің ойымызша, осындай бағытта жұмыс істейтін кейбір орталықтардың деңгейін едәуір төмендететін бірқатар кемшілік те бар. Атап айтқанда, мұндай қызметпен айналысу құқығына лицензия алмай, «жартылай заңды» жұмыс істеу жиі кездеседі. Соның салдарынан көптеген оңалту орталығының штатында психикалық денсаулық саласындағы білікті мамандар жоқ, сондай-ақ кешкі және түнгі уақытта медицина қызметкерлері тарапынан тиісті күтім көрсетілмейді.
Аталған жайттардың бәріне қарамастан, олардың жұмыс істеудегі табыстылығын және халықтың белгілі бір тобы арасындағы танымалдығын ескерсек, қазіргі жағдайдағы өміршеңдігін мойындау қажет.
WhatsApp
Telegram